Ljóst var að starfsárið yrði krefjandi fyrir stjórn SA, enda var Lífskjarasamningurinn að renna sitt skeið haustið 2022 og veturinn því markaður af kjaraviðræðum í erfiðu efnahagsumhverfi. Um svipað leyti og ný stjórn SA tók við hófu kröfugerðir frá stéttarfélögum að berast. Lituðust umfjöllunarefni stjórnar af þeim álitamálum sem uppi voru í tengslum við kjaraviðræður svo sem svigrúmi til launahækkana í verðbólguumhverfi, afstöðu til samningstilboða og viðbrögðum við verkfallsboðunum og miðlunartillögum.
Stjórn SA, sem skipuð er tuttugu fulltrúum auk formanns, kom níu sinnum saman á starfsárinu. Undir lok árs 2022 náðust stefnumarkandi kjarasamningar við SGS, VR og samflot iðnaðarmanna sem undirritaðir voru til 15 mánaða undir yfirskriftinni Brú að bættum lífskjörum. Erfiðara reyndist að ná samningum við Eflingu stéttarfélag en Efling sleit viðræðum við SA og boðaði verkföll í byrjun febrúar. Verkföll Eflingar voru til umræðu á vettvangi stjórnar sem og verkbann af hálfu SA og miðlunartillögur ríkissáttasemjara. Samhliða vinnudeilunni voru málefni Vinnudeilusjóðs rædd.
Formaður: Eyjólfur Árni Rafnsson
Varaformaður: Bjarnheiður Hallsdóttir
Arna Arnardóttir
Árni Sigurjónsson
Benedikt Gíslason
Birna Einarsdóttir
Bogi Nils Bogason
Edda Rut Björnsdóttir
Einar Sigurðsson
Guðrún Jóhannesdóttir
Gunnar Egill Sigurðsson
Heiðrún Lind Marteinsdóttir
Hjörleifur Stefánsson
Jón Ólafur Halldórsson
Jónína Guðmundsdóttir
Magnús Hilmar Helgason
Ólafur Marteinsson
Rannveig Rist
Sigurður R. Ragnarsson
Tómas Már Sigurðsson
Ægir Páll Friðbertsson
Á fyrsta fundi nýrrar stjórnar voru eftirfarandi kosin í framkvæmdastjórn, sem skipuð er sjö fulltrúum auk Eyjólfs Árna Rafnssonar, formanns SA: Árni Sigurjónsson, Birna Einarsdóttir, Bjarnheiður Hallsdóttir, Heiðrún Lind Marteinsdóttir, Jón Ólafur Halldórsson, Rannveig Rist og Sigurður R. Ragnarsson. Þá var Bjarnheiður Hallsdóttir kjörin varaformaður samtakanna.
Framkvæmdastjórnin kom tíu sinnum saman á starfsárinu og ræddi, auk mála sem rædd voru í stjórn, framtíðarskipulag samtakanna,markaðsmál, innleiðingu evrópsks regluverks og möguleika á starfsemi samtakanna í Brussel, atvinnugreinanálgun í tengslum við loftslagsmarkmið, dómsmál tengd kjaraviðræðum og ráðningu nýs framkvæmdastjóra eftir að Halldór Benjamín tilkynnti um starfslok.
Konráð S. Guðjónsson, hagfræðingur, var ráðinn inn tímabundið til aðstoðar í kjaraviðræðum sem efnahagsráðgjafi SA á meðan Anna Hrefna Ingimundardóttir, aðstoðarframkvæmdastjóri SA, var í fæðingarorlofi. Hannes G. Sigurðsson, ráðgjafi stjórnar og framkvæmdastjórnar og fyrrum aðstoðarframkvæmdastjóri SA, lét af störfum 30. september eftir 37 farsæl ár hjá VSÍ og SA. Halldór Benjamín Þorbergsson, framkvæmdastjóri SA, sagði starfi sínu lausu í mars 2023 eftir tæplega sjö ára starf hjá samtökunum.
